Liabi Baizerinna, liabi Baizer vu Khur
Dia letscht Fasnacht fühlt sich a wia gestr, isch tatsächlich aber schuwieder as Johr her. Ziit also, d’Deko-Schublada z’öffna, d’Konfettikanona z’lada und dr Welt z’zaiga, wia ma a Baiz richtig für d’Fasnacht dekoriart und herrichtet.
Ains isch klar: Mit anra dekoriarta Baiz, gwünnsch immer – und das auno mehrfach.
A dekoriarti Baiz bringt Stimmig, sorgt für Ufmerksamkait und bliibt in Erinnerig. Au in dr Öffentlichkait. Denn au in dem Johr bestoht üsi Jury zuma grossa Tail us Mediavertretterinna und
-Vertretter. As Bild ir Ziitig isch also minimum drin. Schuwidr gwunna. Und wer denn am schönschta dekoriart het, töff sich dia haiss-begehrti Grossplaketta als Hauptpriis in d’Buuda hänga. Gad nomol gwunna.
So machsch mit
Erschtens Baiz dekoriara – isch glaub klar.
Zwaitens Aamelda für d’Baizaprämiarig bis zum 31. Dezember
Drittens D’Jury innaloh, wenns am Mentig, 1. Februar am Nomitag kömmend go luaga
So laufts ab
Dia Dama und Herra vur Jury nehmend sich a viartelstund Ziit zum d'Dekoration und dr Gsamtidruck z’bewerta. Dazua kömmer gern au mitanand aastoossa. Bitte tüand d’Jury nocher aber nit wiiter bewirta – nit dass aina no wegama Pelzmantel in Erklärigsnot kunnt.
Bene. Z’Gwünna gitz a aktuelli Plaketta vur laufenda Fasnacht im Grossformat. Für Platz 1 bis 3. Wemmer wennd, kömmer als Vorstand au a speziella Förderpriis vergeh, seb gsehmer denn. A gnaui Rangliista gemmer aber nit ussa – mitmacha und d’Fasnacht leba lo, isch eh dr beschti Priis.
Miar froiend üs uf euri kreativa Ideea und a lebendigi Fasnacht in Khur.
Dr Voorstand
vur Fasnachtsvereinigug Chur
*dr Rechtsweg isch übrigens uusgschlossa und au sus machemer kai späss mit. Wenn di ameldisch, bisch iiverstanda.