Churer Fasnacht

Vum Schmutziga Dunnschtig bis zum Aschermittwuch ghört d’Bündner Hauptstadt da Narra:
Dr Churer Fasnachtsumzug züücht jedes Johr öppa Driissiig-Tuusig Zuaschauerinna und Zuaschauer uf Khur. As Spektakel, a gsellschaftlichs Eraignis, wo wiit über d’Kantonsgrenza ussa bekannt isch. Drufaba folgt dia ebafalls wiitum beliabti Strossafasnacht – glücklichi Gsichter bis tüüf in d’Nacht. Für d’Lacher sorgend denn dia talentiartischta Schnitzelbänkler überhaupt. Bevor dia füüft – miar sägend dia schönscht – Johresziit denn schuwidr verbi isch, tätschts nomol in da Khurer Gassa wenn d’Guggana am Ziistigobed no aimol Vollgas gebend.

Siit über 100 Johr isch Fasnacht in Khur glebti Tradition. Farbig, luut, pointiart und immer mit ama Augazwinkera luagemer zrugg ufs vergangena Johr. Nebscht üsna ihaimischa Kligga und Gugga froien miar üs jedes Johr uf Fasnächtler vu usserhalb, wo üsa Umzug mitgstaltend.