Liabi Baizerinna, liabi Baizer, Gastronominna und Gastronooma,
Gwerbler und LadabsitzerInna vu Chur
Dia letscht Fasnacht fühlt sich a wia gestr, isch tatsächlich aber schuwieder fasch as Johr her. Ziit also, d’Deko-Schublada z’öffna, d’Konfettikanona z’lada und dr Welt z’zaiga, wia ma a Baiz, as Gschäft odr as Lädali richtig für d’Fasnacht herrichtet und dekoriart.
Jawohl, richtig glesa: Miar öffnend z’Feld und wennd nebscht da Baiza, Bars und Restaurants au alli Churer GwerblerInna ilada zur noia Lokalprämiarig an dr Churer Fasnacht.
Ains isch klar: Mit amna dekoriarta (Lada-)Lokal, gwünnsch immer – und das auno mehrfach.
A kreativi Dekoration sorgt für Ufmerksamkait, bringt Stimmig bi da Kunda und im Team und bliibt in Erinnerig. Au in dr Öffentlichkait. Denn au in dem Johr bestoht üsi Jury zuma grossa Tail us Mediavertretterinna und -Vertretter. As Bild ir Ziitig isch also minimum drin. Schuwidr gwunna. Und wer denn am schönschta dekoriart het, töff sich dia haiss-begehrti Grossplaketta als Hauptpriis in d’Buuda hänga. Gad nomol gwunna.
So machsch mit
Erschtens Dekoriara ! – isch glaub klar.
Zwaitens Aamelda für d’Lokalprämiarig bis zum 31. Dezember 2026
Drittens D’Jury innaloh, wenns am Mentig, 1. Februar 2027, am Nomitag kömmend go luaga
So laufts ab
Dia Dama und Herra vur Jury nehmend sich öppa a Viartelstund Ziit zum Dekoration und dr Gsamtidruck noch klara Kriteria z’bewerta. Dazua kömmer gern au mitanand aastoossa. Bitte tüand d’Jury nocher aber nit wiiter bewirta/beschenka – nit, dass aina no wegama Pelzmantel in Erklärigsnot kunnt.
Z’Gwünna gitz a aktuelli Plaketta vur laufenda Fasnacht im Grossformat. Für Platz 1 bis 3. Wemmer wennd, kömmer als Vorstand au a speziella Förderpriis vergeh. A gnaui Rangliista gemmer aber nit ussa – mitmacha und d’Fasnacht leba lo, isch immer Platz 1.
Miar froiend üs uf euri kreativa Ideea und a lebendigi Fasnacht in Chur.
Dr Voorstand
vur Fasnachtsvereinigug Chur
*dr Rechtsweg isch übrigens uusgschlossa und au sus machemer kai späss mit. Wenn di ameldisch, bisch iiverstanda.